U3F1ZWV6ZTk1MTcyMjU2NjgxOV9GcmVlNjAwNDI4ODkxMTU2

٣ ڤيتامينات ضرورية للاطفال و الرضع تقوي المناعة و تحمي من الامراض و تزيد الذكاء

 


هناك بعض الفيتامينات الضرورية تقوي مناعة الجسم و تقي من الامراض و تزيد الذكاء و تساعد علي النمو الطبيعي  للاطفال و الرضع 

جميع منظمات الصحة بتوصي ان كل الاطفال ياخدوها خاصه من عمر الولادة و حتي عمر خمس سنوات دا علي اعتبار ان الطفل بعد الخمس سنوات شهيته للاكل بتتحسن و بياكل اكل متوازن فيه كل العناصر الغذائيه لكن لو الطفل وضعه عكس كدة يبقي لازم يستمر عليهم حتي بعد عمر خمس سنوات 

تابعوني لنهاية الفيديو عشان هقول تحذير في غاية الخطورة متعلق بالموضوع دا و ماتنسوش تضغطو اعجبني و تبعتو الفيديو لكل معارفكم لتعم الفائدة 

اول فايتامين هو اهمهم علي الاطلاق و هو فايتمين دال 

احدث الابحاث اكتشفت ان الفايتامين دا تحديدا بيأثر في كل وظايف الجسم بشكل كبير جدا من لحظة تكوين الجنين في بطن امه و حتي اخر لحظة في حياة الانسان و اكتشفو كمان ان امراض كتير جدا جدا سببها نقص في فيتامين دال و دا خلي جميع الاطباء حاليا يطلبو تحليل نسبة فايتامين دال من اي مريض ايا كان شكوته 

المشكلة الاكبر ان مصادر الفايتامين دا محدودة جدا و النسبة اللي بناخدها من الاكل اقل بكتير من احتياجنا اليومي 

اشهر صنفين غنيين بفايتامين دال هما البيض و الاسماك الدهنيه 

و طبعا بعض الناس مش بتقدر تاخد الصنفين دول في اكلهم اليومي لاسباب كتير منها الحساسية مثلا 

و دا خلي شركات الاغذية و خاصه اطعمة الاطفال تضيف فايتامين دال علي منتجات كتير زي مثلا جبوب الافطار اللي هي السيريال زي الكورن فليكس مثلا

بسكوت الاطفال

السريلاك الجبن و الالبان و انواع تانية كتير 

بس برضو مهما اخدنا من الاطعمة دي مش هنقدر ناخد الكمية الكافيه لاجسامنا 

المصدر التاني الرئيسي لفايتامين دال هو الشمس و دا اهم مصدر بالنسبة للكبار بس طبعا مش هنقدر برضو نعتمد عليه و نكتفي بيه لاسباب كتير منها مثلا 

في الشتا الشمس مش موجودة و في دول اوروبيه بتقعد شهور طويلة ماتشوفش الشمس اطلاقا

برضو في الصيف الشمس حارقة و ماحدش بيقدر يستحمل يقعد فيها فترة طويلة و خاصه الاطفال 

و كمان لازم نختار اوقات معينة للتعرض للشمس بحيث نتجنب الاشعه الضارة المسرطنة و افضل الاوقات بتكون اول ساعه بعد الشروق و اخر ساعه قبل الغروب 

و مهم جدا نستخدم كريم واقي من الشمس قبل مانتعرض ليها و تكون نسبة حمايتة ٣٠٪ او اكثر عشان يمنع وصول الاشعه المسرطنة للجلد 

و لازم جزء كبير من الجلد يكون مكشوف عشان يمتص اكبر قدر من الاشعه و يكون اكبر كمية ممكنة من فايتامين دال 

مع كل العوائق دي اصبح لا مفر من تناول فايتامين دال في صورة دواء او مكمل غذائي عشان نضمن ان الطفل علي الاخص اخد كل احتياجاته اليومية اللي هتضمن نموه بشكل سليم و تحميه من الامراض 

ناخد نوع ايه و جرعه ايه

طبعا النوع مش هيفرق اطلاقا لانها مجرد علامات تجارية 

فهناخد اي نوع يوصي بيه الطبيب المعالج و الجرعه الوقائيه غالبا هتكون علي حسب عمر الطفل و حالته و اغلب الانواع بتكون في هيئة نقط و بيكون برضو مكتوب عليها الجرعه 

الاطفال من لحظة الولادة و حتي عمر السنة و اللي بيرضعو طبيعي فقط هيحتاجو من ٨.٥ ل ١٠ ميكروجرام او ٤٠٠ وحدة دوليه فايتامين دال يوميا و لازم ياخدوها حتي لو الام بتاخد فايتامين دال و حتي لو الطفل بياكل اكلات غنية بفايتامين دال و بيتعرض للشمس يوميا يعني اساسيه لا غني عنها


الاطفال من لحظة الولادة و حتي عمر السنة اللي بيرضعو صناعي او بيرضعو خليط بين الصناعي و الطبيعي و بياخدو علي الاقل ٥٠٠ مل حليب صناعي يوميا مش محتاجين فايتامين دال اطلاقا لان كل انواع الحليب الصناعي مدعمة بفايتامين دال و لو اديناه للطفل بالاضافه للحليب الصناعي هيعتبر بياخد جرعه زايدة ممكن تضره و تاثر علي صحته بشكل سلبي 


الاطفال بين عمر سنة و ٤ سنوات بيحتاجو جرعه يومية تعادل ١٠ ميكروجرام من فايتامين دال اللي هو برضو ٤٠٠ وحدة دوليه 


من بعد عمر ال٤ سنوات و حتي ٧٠ سنة ١٥ ميكروجرام او ٦٠٠ وحدة دولية 

و بعد عمر ال ٧٠ ربنا يدينا العمر و العافية اجمعين بيحتاج الانسان لجرعه اكبر بتوصل ل ٨٠٠ وحدة دوليه او ٢٠ ميكروجرام من فايتامين دال 


تاني فايتامين هو فايتامين الف 

و دا مهم جدا للمناعه و النظر و الجلد بس من رحمة ربنا متوفر في مصادر كتير و بكميات كبيرة 

زي مثلا منتجات الالبان 

الجزر 

البطاطا الحلوة

المانجو

الخضروات الورقيه زي السبانخ و الكرنب و البروكلي 

و بعض المواد الغذائية مدعمة بيه خاصه المنتجات الدهنيه زي مثلا الجبنة السبريد

طبعا منظمة الصحة العالمية برضو بتأكد علي ضرورة تناول الطفل للاطعمة الغنية بفايتامين الف عشان يحصل علي احتياجاته اليومية اللي هي

الفين وحدة دوليه لحد عمر ٣ سنوات

و ٣٠٠٠ وحدة دوليه بعد عمر ال ٣ سنوات 

بالنسبة للاطفال اللي بترضع طبيعي حليب الام مع الاسف فقير في فايتامين الف و عشان كدة في مصر وزارة الصحة بتصرف لكل ام كبسولة فايتامين الف عند تسجيل الطفل و دي بتزود كمية فايتامين الف في حليب الام بحيث يكفي الطفل لاول ٨ شهور من عمره بحيث بعد كدة يقدر يستمد كفايته من الاكل 

اما بالنسبة للاطفال اللي بيرضعو صناعي فكدة كدة الحليب الصناعي مدعم بكل الفايتامينات المهمة 

فلو حسيتي ان طفلك ما بياخدش كميات كافيه من الاطعمة الغنية بفايتامين الف استشري الطبيب لوصف مكمل غذائي او فايتامين خارجي عشان تحمي طفلك من الامراض الخطيرة اللي ممكن يسببها نقصه زي مثلا العشى الليلي و امراض القرنية الملتحمة 


اخر فايتامين معانا هو فايتامين سي و دا مهم جدا برضو للمناعه و خاصة مناعه الجهاز التنفسي و كمان اساسي لامتصاص الحديد اللي بيحمينا من مرض فقر الدم او الانيميا و مشاكله الرهيبة

و لله الحمد متوفر جدا في اطعمة كتير خاصه الحامضيه زي البرتقال و الطماطم و الفلفل الاخضر و البروكلي و الفراولة و الكيوي 

و برضو من رحمة ربنا انها اكلات الاطفال بيحبوها فسهل نديهم كل احتياجاتهم منها و مانحتاجش نديهم مكمل غذائي او فايتامين دوائي بس لو حسينا ان الطفل رافض الاصناف دي و بيتعرض لوعكات صحية كتير خاصة نزلات البرد نستشير الطبيب لوصف فايتامين سي خارجي يعوض النقص اللي عند الطفل 


و بكدة نكون خلصنا حلقة النهاردة 

اتمني اكون افدتكم و انتظروني بحلقات اجمل دمتم في صحة و سعادة


تعليقات
ليست هناك تعليقات
إرسال تعليق

إرسال تعليق

يسعدنا الرد على جميع الاستشارات مجانا. د/ ندى فهيم

الاسمبريد إلكترونيرسالة