وباء المرض الخامس يستهدف الاطفال و يرعب الامهات. طبيب اطفال
الحقيقه هنقول بعض الحقائق العلميه عشان اطمنكم بس دا لا يغني ابدا عن زياره الطبيب اذا ظهرت الاعراض علي الطفل لاستبعاد اي مرض تاني خطير لا قدر الله
اول معلومة لازم نعرفها ان المرض دا بيسببه فيروس اسمه باروفايرس ١٩ و سبب تسميته بالمرض الخامس انه دايما بيحتل المرتبه الخامسه في تصنيف اشهر الامراض المسببه لطفح جلدي عند الاطفال
ممكن يصيب الاطفال في اي عمر و خاصه الاطفال في عمر المدرسه و كل ماكان عمر الطفل اصغر كل ما قلت حدة الاعراض
و هو الحقيقه مرض موسمي يعني الحالات بتظهر في اوقات معينه من السنه و بتسبب وباء بين الاطفال و دا بيحصل في نهايه الشتاء و بدايه الربيع اللي هو الوقت الحالي فياريت نحذر منه
بتنتقل العدوى بين الاطفال بالرذاذ يعني ممكن الطفل يتعدى لو كان قريب من شخص مصاب بيكح او يعطس
اهم عرض بيميز المرض دا هو ظهور طفح جلدي لونه احمر او وردي علي خدود الطفل يشبه اثار الصفع او الضرب بالألم يعني يبان كإن حد ضرب الطفل بالكف علي وشه
ممكن برضو الطفح الجلدي يظهر في اماكن تانيه من الجسم زي الصدر و البطن و خلف القدمين و الرجلين و حتي في بطن القدم و بيكون شكله شبيه بقماش الدانتيلا
و مع الاسف اوقات بيكون معاه هرش و دا بيضايق الطفل اكتر من اي حاجة تانيه و برضو نخلي بالنا ان الاستحمام ممكن يسبب ظهوره بوضوح و زيادته
و عاده بيختفي لوحده في خلال ١٠ ايام و التهابات الوجه بتختفي اسرع من التهابات الجسم
اغلب الاطفال بتعاني من اعراض عدوى فيروسيه قبل ظهور الطفح او الاتهابات الجلديه و بتكون في صوره
حرارة
سيلان في الانف
صداع
احتقان في الحلق
اعياء و ارهاق
الام و تورم في المفاصل اللي لو ظهرت بتاخد وقت طويل علي ماتختفي ممكن توصل لاسابيع خاصه اذا كان عمر الطفل كبير
في الفترة دي بيكون المصاب معدى و بمجرد ظهور الطفح او الالتهاب الجلدي بتنتهي فتره العدوى و بيصبح المصاب غير معدي و بالتالي بيكون امان انه يختلط باطفال تانيه و يروح المدرسه و الحضانه عادي حتي لو الطفح الجلدي لازال ظاهر
يعني الطفح الجلدي في حد ذاته غير معدي مادام الطفل سليم صحيا و لا يعاني من اي امراض مناعيه او بياخد ادويه تضعف المناعه و تخليه معدي لفتره اطول حتي بعد ظهور الطفح الجلدي
لازم برضو نعرف خطوره المرض دا عالحوامل
الحقيقه الحامل ممكن يجيلها المرض دا و مع الاسف بيتنقل للجنين لكن من رحمة ربنا انه ما بيسببش مضاعفات خطيره
في بس بعض الابحاث بتقول ان ٥ في المية من الاجنه اللي اتعرضو للمرض دا في فتره الحمل ممكن يجيلهم انيميا حاده بسببه
فواجب نحذر برضو و نبلغ الطبيب فورا لو اي حامل اتعرضت لطفل مصاب عشان يوصفلها الادويه المناسبه
الميزه في المرض دا ان ما بيحتاجش علاج معين
مجرد مسكنات و خوافض حراره و دوا حساسيه او مرهم للهرش و عاده بيخف لوحده بدون اي مضاعفات و المناعه له دائمه ان شاء الله يعني لو الطفل اتصاب مره مش بيجيله تاني الحمد لله
في بعض الحالات بس اللي بيكون المرض شديد عليها شويه زي الاطفال اللي عندهم انيميا او مرض مناعي او بياخدو ادويه تضعف المناعة و دول بيحتاجو ادويه للسيطره عالمرض و ممكن توصل لنقل دم اذا استدعى الامر و بوصف من طبيب اطفال
عايزين نطلع من حلقه النهارده بالاتي
المرض الخامس هو عدوى فيروسيه بتصيب الاطفال من كل الاعمار
بتتنقل بالرذاذ و بتتميز بطفح جلدي عالوجه كان الطفل اتصفع او اتضرب كف و بتشفي لوحدها بدون مضاعفات في اغلب الحالات و عاده العلاج بيكون خافض حراره و مسكنات و ملطف للجلد او مضاد حساسيه للهرش
و ماتنسوش تستشيرو طبيب اطفال فور ظهور اي اعراض علي الطفل ربنا ما يكتبه علي اي حد فينا
دمتم في صحة و سعاده
إرسال تعليق
يسعدنا الرد على جميع الاستشارات مجانا. د/ ندى فهيم