تعرفي على افضل ٥ اصناف بيوريه بسيطه تقدميهم لطفلك في بدايه الفطام عن الرضاعه و ادخال الاكل الصلب
كل الاصناف اللي هقولها مناسبه من عمر الشهر السادس و ممكن الرابع لو الطبيب نصح ببدايه الاكل الصلب بدري و بالتأكيد اصناف ممتازه للاطفال الاكبر لان قيمتها الغذائيه عاليه جدا و فوايدها مهمة جدا لصحه الجسم و المناعه و نمو المخ و زياده الذكاء
قبل ما نقول الاصناف محتاجة بس افكركم ببعض المعلومات المهمة جدا اللي لازم كلنا نعرفها
ما ينفعش ابدا ادخل للطفل الاكل الصلب قبل ما يظهر علامات الاستعداد زي مثلا انه يكون بيعرف يقعد و يصلب راسه و ظهره
و زي برضو انه يكون مهتم بالاكل و عايز فعلا يجرب اللي انا باكله
و عامة ما ينفعش علي الاطلاق نقدم للطفل اي حاجة غير الحليب في اول ٤ شهور من عمره
و اخر معلومة مهمة هي ان الحليب سواء طبيعي او صناعي هو الغذاء الرئيسي و مصدر الطاقه الاساسي للطفل في اول سنه من عمره و الاكل الصلب قبل عمر السنه هدفه فقط اللعب و الاستكشاف و الاستمتاع
و دايما افتكرو ان اي اكل جديد بنقدمه للطفل بنبدء بكميه بسيطه اوي اوي و نقدمه لوحده تماما بدون اي اضافات و نراقب الطفل لمده ٣ ايام و لو ظهر اي اعراض عالطفل زي مثلا هرش طفح جلدي او حتي اسهال او امساك اي عرض في خلال ال ٣ ايام دول lاتقدميش الصنف دا تاني اطلاقا الا بعد استشاره الطبيب
تعالو نشوف بقي افضل ١٢ بيوريه نحضره للطفل و ازاي نحضره
عشان نحضر بيوريه اللي هو اكل مهروس جدا و ناعم للطفل محتاجين نسلق المكونات الصلبه في سوائل و بعد ما تستوي او نقطعها نيه و نخلطها في الخلاط او الهاند بلندر فنحاول دايما نختار المكونات الصلبه زي مثلا الخضار و الفاكهه و خلافه من اجود الانواع اللي نقدر عليها و طبعا الافضل علي الاطلاق هي المنتجات العضويه اللي مادخلش في تكوينها اسمده او مبيدات حشريه
و السوائل اللي هنستخدمها نختار الافضل منها زي مثلا المايه النظيفه حليب الام الحليب الصناعي و ممكن شوربه اي بروتين بدون اضافه ملح
و عشان تحسنو طعم الاكل للطفل ممكن تضيفو كميات بسيطه جدا من نباتات عطريه طازجة زي مثلا البقدونس و الزعتر و الكزبره و الثوم و ممكن بعض التوابل زي القرفه مثلا و الكمون
اول صنف بيوريه هو البطاطا الحلوه
الاطفال بيعشقو الاكله دي مش بس عشان سهله البلع و مسكره بسكر طبيعي لا كمان في ابحاث ذكرت انها بتحسن الحاله المزاجيه للانسان و بتحفز هرمونات السعاده
و طبعا غنيه بالألياف الطبيعيه اللي بتحسن وظيفه الجهاز الهضمي و تعالج الاسهال و الامساك
و مدعمه بالفيتامينات المهمة جدا لصحة الجسم و مناعه الجهاز التنفسي و كمان نمو و تطور العين و النظر
بنحضرها بطريق مختلفه افضلهم علي الاطلاق هي الشوي في الفرن لانها بتديها قوام ناعم حرير و كمان بتظهر طعم السكر الطبيعي اللي فيها
فاغسلي البطاطا كويس و اعملي فيها بعض الفتحات او الاخرام البسيطة بالسكينه و حطيها في فرن لمده ٤٥ دقيقه عالاقل علي درجة حراره من ١٨٠-٢٠٠ درجة مئويه
و لما تستوي تماما و تبرد اهرسيها بالشوكه و قدميها للطفل و ممكن تضيفي عليها قرفه بتخلي الطعم الذ و بتزود شهيه الطفل و بتثير حاسه التذوق عنده و تعرضه لنكهات
طبعا ممكن لو طفل اكبر نطبخها بطرق مختلفه زي مثلا صوابع مشويه في الفرن او مقليه و ممكن شيبسي و ممكن نضيفها علي شوربه الخضار و اليخنه و كذلك السلطه و الرز
تاني صنف هو بيوريه الموز
و دا قنبله بوتاسيوم مفيده جدا جدا لجسم الطفل و احلي حاجة فيه ان مش محتاج طبخ و تحضير بكل بساطه بنختار موزه مستويه و الافضل علي الاطلاق اللي بيكون بدء القشره بتاعتها يظهر فيها لون اسود و نهرسها بشوكه و نقدمها للطفل و برضو ممكن نضيف عليها توابل زي القرفه مثلا
بيوريه الافوكادو
دا بقي غذاء المخ تحديدا لانه اكثر فاكهه دسمه علي وجه الارض و الدهون بتاعته صحيه جدا و بتدخل مباشره علي مخ الطفل فنعمل المستحيل عشان نديله الصنف دا لو في مقدرتنا
و دا برضو بيتميز انه مش محتاج طبخ و تحضير بنهرسه بس بالشوكة و نقدمه للطفل و ممكن نضيف عليه الكمون و زيت الزيتون عشان نضاعف الفايده و لما الطفل يكبر ممكن نقطعه و نقدمه كفينجر فود الطفل يمسكه بايده و ممكن ندهنه علي توست او اي عيش و ممكن نستخدمه كصوص الطفل يغطس فيه بسكوت او خبز محمص او اي مقرمشات
ممكن برضو تضيفوع عالعصاير الطبيعيه لان بيديها سماكه و نعومه في القوام و طبعا طعمه بيستخبي و بالتالي الطفل بياخد فايدته بدون ما يحس بطعمه
حاولو تختارو الافوكادو اللي قشرته غامقه و احساسه لين في الايد لان الاخضر الصلب بيكون مر جدا و مش ناعم لما يتهرس و الطفل بيرفضه تماما
بيوريه الشوفان
و دا صنف مهم جدا للطفل في كل مراحل حياته لانه غني بالالياف الطبيعيه المفيده جدا و كمان الحديد
و طريقه تحضيره سهله جدا بتكون بسلق كوب من الشوفان مع كوبين من السوائل لحد ما يطرى الشوفان او يدوب و نخلطه في الخلاط او ننعمه بالهاند بلندر و نقدمه للطفل ممكن بدون اي اضافات كتجربه اولي و ممكن نحسن مذاقه ببعض التوابل زي القرفه و الكمون و ممكن نضيف عليه فواكه و خضروات تانيه و طبعا ينفع يتضاف علي اي اكل او عصير لتكثيف و تنعيم القوام
بيوريه الدجاج
كتير من الامهات بتخاف تقدم للطفل البروتين في بدايه ادخال الطعام الصعب و بتقلق انه يكون تقيل علي معدته بس الابحاث اثبتت انه لا يختلف ابدا عن الخضار و الفاكهه و انه امن للطفل من عمر الشهر السادس و مفيد جدا خاصه الدجاج لانه مش بس مصدر غني بالبروتين لا دا كمان في عناصر تانيه مهمة جدا زي الزينك و المعادن المهمه لتقويه جهاز المناعه و حمايه الجسم من الامراض
و عشان نحضر بيوريه الدجاج بنطبخ الاول الصدور المخليه من العضم و الجلد و افضل طريقه هي الشوي في طاسه بكميه زيت بسيطه جدا سواء زيت عباد الشمس او زيت زيتون و بعد ما تستوي تماما نضيف كميه كافيه من السواىل سواء بقي مايه او حليب من اللي الطفل بيشربه و نطحنهم كويس جدا و ممكن نصفيهم كمان لو عايزين قوام ناعم اوي
و ممكن نحسن الطعم ببعض التوابل زي القرفه مثلا او الكمون
كده احنا ذكرنا افضل اصناف بيوريه فرديه يعني فيها مكون واحد بس و دا اللي لازم نعمله كبدايه عشان نختبر الحساسيه و لما نتاكد ان الطفل مش حساس لاي مكونات نبتدي نخلط بقي صنفين او تلاته عشان نحسن الطعم و نعلي القيمه الغذائيه
هقولكم علي بعض الخلطات اللذيذه و الصحيه في الفيديو الجاي بكره ان شاء الله في نفس المعاد فاستنوني
دمتم في صحة و سعاده
إرسال تعليق
يسعدنا الرد على جميع الاستشارات مجانا. د/ ندى فهيم