٣ ڤيتامينات ضرورية للاطفال و الرضع تقوي المناعة و تحمي من الامراض و تزيد الذكاء

فطام الطفل الرضيع عن اتيتينة او المصاصه او اللهايه او الدامي او الباسيفاير او البينكي اللي هي الحلمة الشبيهه بزجاجة الرضاعه مع اختلاف مسمياتها موضوع مقلق لكل الامهات فتعالو نهونه عليهم شويه

لو عايزين تشوفو الفيديو بدل قراءة المقال اضغطو هنا

الاول عايزين شوية معلومات عنها 

اول حاجة نعرفها ان مش كل الاطفال بيتقبلوها 

في اطفال كتير بترفضها و مش معني ان الطفل تقبلها ان عنده خلل او هيحصله مشكله مستقبل اطلاقا 

دي مجرد فروق فرديه بين الاطفال و رغبات كل طفل بيشبعها بطريقة مختلفه

يعني مثلا ممكن طفل يحب ياخدها لما يكون بيبكي و يهدى و يسكت معاها

طفل لازم ياخدها عشان يعرف ينام

طفل بياخدها وقت التسنين بس

طفل بياخدها عشان تريح الالم اللي في اذنه 

طفل بياخدها مجرد عادة مش اكتر اتعود ان دايما يكون بيمص في حاجة و فمه بيتحرك

و عشان نعرف نفطم الطفل لازم نعرف السبب و بالتالي نقدم بدايل او نعالجه فيسهل علينا جدا فطام الطفل منها 

هو ليه اصلا لازم نفطمه منها

عشان بعض الابحاث اثبتت ان استمرارها فترة طويلة خاصه بعد السنة بيسبب بعض المشاكل 

زي تأخر الكلام مثلا

و برضو يقال انها بتأثر بالسلب علي نمو عضلات الوجه و الفكين و اللسان و كذلك نمو الاسنان خاصه لو استمرت لبعد السنتين 

طيب ايه انسب وقت افطم فيه الطفل منها 

دا بقي متروك لحكمك كأم بس طبعا كل ما كان بدري قبل عمر السنة كل ماكان اسهل و افضل 

بس ارجوكي تجنبي الاوقات اللي فيها ضغوط نفسيه عالطفل و محتاج فعلا حاجات تهديه 

زي مثلا بدايه الحضانة

نقلتو بيت جديد

ولادة طفل جديد في الاسرة

و غيره من الاحداث الكبيرة في حياة الطفل 

ننفذ ازاي بقي 

افضل انواع الفطام من اي حاجة عالاطلاق هو الفطام التدريجي اللي هو بنسحب الشيء علي مدار الوقت مش فجأة

في حاجات بسيطة ممكن نعملها تساعدنا شوية

زي مثلا نحطها في مكان بعيد عن نظر الطفل لان طول ما هي قدامه هيحطها في فمه بس لما يطلبها نديهالو 

نحاول بس نتأخر شوية في تنفيذ الطلب و نشتته بحاجات تانية لحد ما نوصل لدرجة مش متقبل اي تشتتيت نديهالو 

خلو بالكم ممنوع نرفض ابدا و لا نذكر اسمها و احنا بنشتته

يعني ما ينفعش اقوله لا انت كبرت عالتيتنه تعالي ناخد تفاحة احسن هيبكي فورا 

لكن لما اقوله حاضر تعالي ندور عليها 

ايه رئيك تاكل موزة و احنا بندور عليها 

بالتأكيد اغلب الوقت هيتقبل البديل و يصبر شويه

انصحكم جدا تستخدمو الطريقه المشروحة في فيديو تعليم مهارة الصبر للاطفال لما يطلبها عشان يستجيب للتشتيت و بالمرة نعلمه الصبر عالامور الاخرى

نحاول بقي نطبق نفس خطوات الفطام التدريجي من الرضاعه لانها زيها زي الببرونة الخاصه بالرضاعه 

فنعمل جدول بالأوقات اللي الطفل بيطلبها فيها في اليوم و كل مرة بيمص فيها اد ايه 

و نبتدي نسحبها بالتدريج من النص في اتجاه الاطراف

ممكن التدريج يكون في مدة المص و ممكن يكون في عدد مرات المص 

يعني ممكن مثلا لو بياخدها ٥ مرات في اليوم كل مرة نص ساعه

ابتدي بالمرة اللي في وسط اليوم و اللي ما تكونش مرتبطة بنوم و اسحب المرة دي كلها و احاول اشتت انتباهه ببدايل او لو عايزة ادرج بصورة ابطء و اطول يبقي اديهالو بس لمدة ٢٠ دقيقه بس و اسحبها و اقدم بدايل و اشتت الانتباه 

اتوقع سحب مرة كاملة يكون اسهل من تقليل المدة من وجهة نظري بس لكن ممكن تقليل المدة يكون اسهل معاكي 

فانصحكم تشوفو فيديو الفطام عشان تعرفو كل التفاصيل و الاحتياطات هتلاقو الرابط في صندوق الوصف و التعليقات

طبعا بالتأكيد اصعب واحده هتكون المرتبطة بالنوم 

و دي هتحتاجي تقدمي بدايل تهدي الطفل و تساعده ينام

ممكن تضطري تهزيه او تشيليه و تتمشي بيه او تحضنيه و هو نايم او تعمليلو مساج او تشغليلو موسيقي هادية او تغنيلو 

طبعا هيحتاج مجهود كبير و طاقه بس الموضوع مش بيطول عن اسبوع بأي حال من الاحوال 

ممكن برضو تقدميلو بديل لعبه معينه ناعمة و طريه يختارها بنفسه و يحضنها مثلا كتعويض عن المصاصه

انصحكم جدا تشاهدو فيديو روتين نوم الرضيع و التخلص من مشاكل النوم هيساعدكم في حلول لتهدئة الطفل وقت النوم بحيث ينام من غير المصاصه 

هتلاقو الرابط في وصف الفيديو و في التعليقات 

في ناس بتفضل الفطام المفاجئ و بيبقي عندهم جرأه و قوة لتحمل انهيار الطفل و توسلاته بصراحة انا ماقدرش علي كدة فعمري ما هنصح بيه حد 

خاصه انه مؤذي نفسيا جدا جدا للطفل و الأم و بعض الابحاث بتربط امراض نفسيه و عنف عند الكبار بالفطام المفاجئ في الصغر 

في ناس مثلا بتخبيها و تقول ضاعت

و في ناس بتقول لا انت كبرت مش هينفع خلاص

في ناس بتقصها و في ناس بتدهنها بألوان تنفر الطفل

في ناس بتحط عليها مواد تغير طعمها 

في ناس مفترية بتربطها في بالونه هيليوم و تخلي الطفل يطيرها و المسكين بيفكرها لعبه و مش مدرك ان بإيده بيضيع مصدر امانه للأبد

بصراحة انا شايفه ان دا نوع من انواع القسوة الغير مبررة و الافضل ندور علي حلول اكثر رحمة 

اهم نصيحة عالاطلاق هي الثبات و عدم الرجوع للخلف

يعني ما ينفعش نوصل لمرحله و نضعف و نرجع للي قبلها

ما ينفعش تكوني منعتيها طول اليوم و مسموحة بس وقت النوم و تيجي في يوم يمرض او يبكي تضعفي و تديهالو كدة بتصعبي الموضوع جدا علي نفسك و طفلك 

لو فرضنا استجد ظروف ضغطت علي نفسية الطفل يبقي نثبت في المرحلة اللي وصلنالها و نكمل بعدين لما الامور تتحسن

لازم برضو كل المحيطين بيكي سواء اهل او اصدقاء او حتي الحضانة يكونو عارفين باللي بيحصل و المرحلة اللي وصلتولها و الخطة بتاعتكم عشان كله يدعمكم و يمشي علي خطاكم ماحدش يبوظ اللي عملتيه و يلخبط الطفل 

و اخر نصيحة مني 

هدي نفسك خالص و ماتسمحيش لحد يوترك لان دي مرحلة و هتعدي زي ما الاف غيرها عدو الالف غيرها هيعدو برضو 

اتمنى اكون افادتكم و انتظروني في حلقات اجمل ان شاء الله

دمتم في صحة و سعادة