.jpg)
لوحة المكافآت او الريورد تشارت الخاصه بالأطفال و اللي هي واحدة من أساليب التربيه الايجابيه الحديثه هنعرف هي ايه و ايه استخداماتها و مناسبه لعمر كام و ايه قوانينها و اسرار النجاح و أسباب الفشل
لمشاهده الفيديو بدلا من قراءة المقال اضغط هنا
ايه هي لوحة النجوم
دا تعبير بيطلق علي حاجة بستخدمها لتعديل بعض سلوكيات الأطفال و بقدم للطفل مكافآت او نجوم في مقابل السلوك المستهدف
بيكون هدفها اما تعزيز السلوك الايجابي و التعود عليه و تثبيته في روتين الطفل او التخلص من السلوك السلبي و بتناسب الأطفال من عمر ٣- ٨ سنوات اصغر من ٣ سنوات مش هيستوعبها و اكبر من ٨ سنوات هيستهيفها و هيستقل بيها
و المقصود بالعمر هنا مش العمر الحقيقي للطفل لا العمر العقلي يعني لو طفل مثلا عمره الحقيقي ٣ سنوات لكن عمره العقلي سنتين بس مش هينفع اطبق عليه نظام المكافآت دا
ليه بتفشل مع امهات كتير
الكل بيقولك اعمليلو لوحة مكافأات بس ماحدش بيقول ازاي و تخلي بالك من ايه
يعني مثلا ام عايزة تعلم طفل الصلاة
تروح عاملة اللوحة بالخمس صلوات
و نجمه علي كل صلاة او نجمة علي اليوم لو صلي ال ٥ صلوات و مكافأه لما يصلي الاسبوع
و تلاقي الطفل اول يوم ممتاز
تاني يوم بدء يستصعب الموضوع و يفقد الحماس
٣ يوم فشلت الطريقة تماما
افندم
دا انا ياكبيرة اهو لما بدئت اعلم نفسي الصبر و اتخلص من العصبيه حدد لنفسي ساعتين بس في اليوم ما اتعصبش فيهم كبدايه
تعالو نشوف
طريقتها و اسرار نجاحها ايه
اول حاجة خالص لازم نسجل معدل حدوث الفعل الكويس قبل ما نبتدي اللوحة عشان نقدر نحكم بطريقة موضوعيه عالتجسن
ثانيا نكتب الفعل المستهدف بطريقة ايجابية وواضحة
يعني ما اكتبش ينظف اوضته
اكتب يلم الالعاب او الهدوم من الارض
ما اكتبش
مايرميش هدومه المتسخة عالارض
اكتب بدالها
يحط الهدوم المتسخة في الغساله
لو مثلا عايزة استخدمها لوقف الضرب
هختار وقتين مثلا في اليوم مامدش ايده فيهم و اديلو النجمة
يعني بيلعب معايا في سلام و ماحصلش انه مد ايده
اقوله انا مبسوطة ان احنا لعبنا و ماحدش فينا اتضرب
و اديلو النجمة
نصمم اللوحة بشكل جذاب سواء بقي هنعملها بنفسنا او نطبعها او نشتريها
و ممكن اوي ابتكر فيها
يعني مش شرط أصلا تكون لوحة و كل مرة يلزق او يرسم نجمة
لا ممكن اجيب بازل ظريفة و كل ما يحقق الحاجات اللي في اللوحة اديلو قطعه يحطها في البازل لحد ما تكتمل وقتها اصلا دي هتكون مكافأه في حد ذاتها و ممكن طبعا اعززها بمكافأه اضافيه
ممكن كمان تكون رسمه و المكافأة انه يلون جزء كل مره
ممكن تكون روايه و المكافأه انه يقرأ فصل او ٥ صفحات مثلا
باختصار ان تصميم اللوحه او نوعها متروك لأفكارك و ابداعك و دا مالوش حدود
لو طفلك كبير و بيعرف يرسم خليه هو يصمم اللوحة بتاعته علي مزاجه و ممكن تاخدي رئيه في نوع اللوحة أصلا هتلاقيه يديكي أفكار حلوة جدا بيحبها و بالتالي هيكون متحمس اكتر انه ينفذها
الافضل تعلقيها عالحيط عشان تبقي قدام عينيه و دايما تحفزه و طبعا
بس خلي بالك لو طفل كبير شوية هيحب يعلقها في مكان خاص ماحدش يشوفها
تعالو نشوف قوانين المكافآت بقي
أولا لازم تكون قريبه خاصه كل ماكان الطفل اصغر يعني ما ينفعش مثلا نقول هخليك تسهر لو جمعت ٥٠ نجمه دا الكبار مش هيتسحملو الصبر دا كله فالافضل نقلل العدد بحيث يكون مستستاغ و يشجع الطفل
خلي المكافآه بسيطه عشان تقدري عليها باستمرار و مش لازم خالص تكون ماديه
ممكن حاجات معنوية
زي مثلا هنتمشي سوا بالليل ساعه و نجيب لب و نأزأزه
هقعد العب او اتكلم معاك ساعه في اي موضوع تحبه
هسمحلك تسهر يوم الخميس لحد ١٢ بالليل
هنشتري قصه جديدة
او لعبه جديدة
هتختار انت نطبخ ايه عالفطار لمدة اسبوع
و هكذا
ممكن برضو نعمل متجر للهدايا و نحط سعر لكل هدية
يعني خمس نجوم يجيبو كورة و ساعه مع ماما
١٠ يجيبو قصة جدا او شوكلاته
٢٠ يجيبو لعبه جديدة او كذا
خلي بالك
ما ينفعش المكافأه تكون اصلا حاجة بياخدها في العادي بدون قوانين او تكون مضاعفات ليها
يعني ما ينفعش اقول هديك شوكلاتين بدل واحده هو ممكن ياخد المتعه من واحدة بس و يكتفي بيها
برضو ننتبه ان المكافأه لازم تتاخد فورا بعد السلوك المستهدف و انتي بتديهالو تفكريه هو اخدها ليه
ممنوع نستخدم المكافأات اللي احنا محددينها او النجوم كوسيله للعقاب او التهديد علي حاجات تانيه مالهاش علاقه بالسلوك المستهدف يعني مش أكون مستهدفه الصلاه و بعدين أقوله لو ضربت اخوك مش هتاخد مكافإه الصلاه حتي لو صليت
و ممنوع برضويخسر نجمه او مكافأه كسبها بالفعل
يعني لو مطلوب انه يعلق هدومه عالشماعه و علقها النهارده و اخد المكافأه و بعدين بكره رماها عالارض فتعاقبيه و تسحبي منه مكافأه امبارح لا هو بس هيخسر مكافإه النهارده
اهم نقطة اللي ماحدش بيذكرها خالص و هي دي سر نجاحها فعلا
و احنا بنصمم اللوحة نحط بس
٣ حاجات عشان الطفل ما تلخبطش
حاجتين الطفل ممتاز فيهم
حاجة اللي محتاجة اشتغل عليها
نجمة للحاجات اللي شاطر فيها
نجمتين للصعبه
مكافأه لما يجمع ١٠ نجوم
مكافأه معنوية
طيب في مثال الصلاة
نعمل ايه مثلا
نحط حاجتين برضو الطفل ممتاز فيهم
بيعلق الجاكيت بتاعه لما يروح
بيغسل ايده بعد الاكل
بيصلي الصبح
و كل واحدة نجمه
لما يكمل اسبوع محافظ فيه علي صلاة الصبح بدون ما افكره يبقي خلاص كدة
اخلي الصبح و الظهر و ياخد ٣ نجمات عليهم و هكذا
اوقف لما الطفل يقدر
خلي بالك لازم اسحبي المكافأات تدريجي
يعني لو استمر الفعل الحلو اسبوع كامل ايام متتاليه بدون ما تفكري الطفل يبقي احنا نجحنا نبتدي بقي نقلل الستيكرز
يعني نخليها يوم بعد يوم او يوم بعد يومين
لحد ما توقف ولو بطل بعدها السلوك الحلو نرجعها تاني علي اقل حاجة وصلنالها
و لو الفعل ثبت و الطفل نسي يطلب ستيكر ما تفكريهوش لحد ماتوقفي المكافأات تماما
اتمني اكون افادتكم و لو عجبكم الفيديو اعملو اعجاب و ابعتوه لاصحابكم و حبايبكم
دمتم في صحة و سعاده
إرسال تعليق
يسعدنا الرد على جميع الاستشارات مجانا. د/ ندى فهيم