٣ ڤيتامينات ضرورية للاطفال و الرضع تقوي المناعة و تحمي من الامراض و تزيد الذكاء

 

اضغط هنا لمشاهده الفيديو 

حلم الاباء و الامهات ان يكون اطفالهم اصحاء جسديا و نفسيا و يتمتعو بشخصية قوية قيادية يزينها الثقة بالنفس و بيكون دا هدفهم الاسمى اللي بيبذلو في سبيله الغالي و الرخيص 

لكن مع الاسف ممكن تصرفات عفوية متوارثة في المجتمعات العربية تدمر كل اللي بيبنوه في لحظات

تعالو نتعرف عالتصرفات دي و نحذر منها بكل قوتنا 

١- السماح لهم بالهروب من المسؤليه 

اغلب الامهات بتعمل مهام اطفالها نيابه عنهم رحمه بهم و تخفيفا عنهم بس مع الاسف دا بيأثر عليهم بطريقه سلبيه جدا لان بيوصلهم في البدايه احساس انهم لا يعتمد عليهم و ليسو اهل للثقه و الحقيقه الطفل الصغير حوالي ٣ سنوات بيغضب جدا من تصرف زي دا و بيبكي و يعترض عشان يعمل مهامه بنفسه و يلح بطلب المساعده في مهام الكبار كمان عشان يحس بذاته و قدراته و يثبت وجوده في الحياه بس مع الوقت لما الكبار بيرفضو بيبتدي يحس انه مالوش قيمه و يفقد ثقته في نفسه و قدراته و يدرك صغر حجمه و ضعفه و عدم قيمته و ينسحب و بعد كده يحب الراحه و يتعود عليها و يتعلم التكاسل و التواكل و هنا يدرك الاهل خطؤهم لكن متأخر اوي مع الاسف

نصيحتي عشان نتجنب الوقوع في الخطأ دا ان احنا من عمر السنتين نخصص للطفل مهام منزليه مناسبه لعمره و قدراته و نطالبه بيها بطريقه ظريفه و حماسيه و لما يعملها نقدر مجهوده و نشكره و نحسسه ان احنا مقدرين اوي مجهوده و انجازاته

٢- حمايتهم من الوقوع في الخطأ 

طبعا دي بتكون غريزة فينا ان احنا نحمي اطفالنا من اي خطر او سوء و مع الاسف دا غلط لان لما بننقذهم بسرعه بنحرمهم من دروس الحياة القيمة اللي هتقويهم جسديا و نفسيا و بننسي ان الافضل يواجهو الدروس الصغيرة في وجودنا و و دعمنا يتعلمو منها علي مواجهة الدروس الكبيرة القاسية بعد كدة و احنا مش حواليهم 

مش بقول طبعا نشوف الطفل هيقع و يتكسر و نسيبه يجرب لا 

لكن مثلا لما يكون بيتعلم المشي في مكان امن اسيبه يقع و يحاول يقوم و يعلم نفسه 

لما يكون هيوقع مثلا اكل من ايده و هيخسره اسيبه عشان بعد كدة يتعلم يحافظ علي ممتلكاته كويس 

زي مثلا ابني لما اصر يمسك هو كوباية العصير النهاردة و انا متأكدة انه هيوقعها سيبته يمسكها و فعلا وقعها و فعد يبكي و مع ان في عصير تاني رفضت اديله تاني مش كعقاب لا كمحاولة لتعليمه انه ينتبه اكثر 

كل اللي عملته اني تقبلت مشاعره و هديته 

انت زعلان عشان العصير وقع و انت كان نفسك تشربه 

سكت فورا و انتبهلي 

بس انت مامسكتوش كويس عشان كدة وقع 

و انا اسفه مش هقدر اديك تاني دلوقتي 

ممكن تشرب مايه دلوقتي و بعدين العصر ناخد عصير تلني بس تمسكه كويس اوي عشان ما يوقعش برضو 

ايه رئيك انت اللي تملي كوباية الماية 

انا متأكدة ان عمره ما هينسى الدرس دا و دا اللي المفروض نعمله مع اطفالنا مادام مش بنعرضهم لخطر جسيم و هدفنا طبعا الاساسي هو تجهيزهم جسديا و نفسيا لمواجهة الحياة القاسية مستقبلا 

٣- حمايتهم من مشاعرهم 

بنفس الغريزة برضو بنحاول نحمي اطفالنا من اي مشاعر وحشة و نطلعهم منها بسرعه و دا بنعمله من عمر صغير اوي مع الطفل لما بنشتت انتباهه فورا لما يوقع او يتألم او يمر بتجربة مؤلمة نفسيا او يتعرض لازمة نفسية زي فقدان عزيز عليه

و طبعا دا بيأثر سلبيا علي الذكاء العاطفي عند الطفل و بيشوش مشاعره و يلخبطه 

فدايما الصح ان احنا نحاول نفهم الطفل مشاعره و نشرحها و نعبر عنها و نحترمها مهما كانت و نوجه الطفل يعبر عنها بطرق صحيحه و مقبولة 

٤- الاسراف في وقايتهم و مساعدتهم

معلش هي غريزيتنا اقوي مننا و دا بقوله عن تجربه لاني وقعت في الغلط دا تحديدا و كنت بخاف جدا ابني يوقع وقت ما بدء يتعلم المشي و دا سبب انه يتأخر ٦ شهور عن العمر الطبيعي و دا برضو اللي هيحصل مع اي طفل اهله هيحموه بزيادة نموه و تطور مهاراته هيتأثرو جدا بشكل سلبي 

فارجوكم حاولو تقاومو غريزتكم و خوفكم و اعتبرو انفسكم مرشدين للطفل و ليس حارسين له 

وقتها هتقدرو فعلا تساعدوه يتخطى الصعاب و يواكب الحياة و يتغلب عليها 

٥- وضع طموحات و توقعات مرتفعه معينه لهم

كلنا ولا استثني نفسي بنحاول نحقق احلامنا في اطفالنا و في ناس بينجبو اصلا للسبب دا و بالتأكيد دا خطأ كبير جدا محتاجين نتجنبه بكل عزيمتنا لان لما بنحط احلام معينه للطفل و خاصه لما تكون احلام عاليه اوي و صعبه المنال بدليل ان احنا ماقدرناش نوصلها 

دا بيخلي الطفل يحبط من قبل ماحتي ما يبتدي و ما يحاولش اصلا 

برضو بيخلينا نقسو علي الطفل جدا لما يقصر و كمان بتعمي بصيرتنا عن اي نجاح تاني مختلف 

مش غلط ان احنا نحلم و نتوقع و نخطط لاطفالنا بس الغلط ان الحلم يوسع مننا اوي 

خليكم منطقيين و حطو هدف نهائي منطقي و اهداف صغيره كتير في النص عشان تقدرو تحققو الاهداف و انتو مستمتعين فعلا و سعداء و خلو دايما دليلكم 

اذا اردت ان تطاع فأمر بما يستطاع

٦- استخدام العقاب بدلا عن التربيه

عقاب الطفل باستمرار و علي كل الاخطاء بيرسخ في مخه انه فاشل و انه انسان سيء و كمان بيخليه يكرس كل طاقته الفكريه في التخطيط للهروب من العقاب مستقبلا بدل ما يحاول يلاقي علاج او حل للمشكلة 

هل معني كدة ان نمنع العقاب تماما 

لا طبعا 

بس هيكون عواقب 

يعني الطفل تصرف بشكل غير لائق مثلا 

هاتفهم مشاعره و اعبر عنها 

انا شايفه انك غضبان جدا دلوقتي 

و دا خلاك تفقد اعصابك و تعلي صوتك علي اخواتك 

اذكر الخطأ

بس دا مش مسموح في البيت و مش هنقدر ابدا نتقبل الصوت العالي في حياتنا 

نذكر عواقب

عشان كدة ادخل اقعد في اوضتك لحد ما تهدى و تفكر ازاي ممكن تعالج اللي حصل 

طبعا الافضل ان احنا نقعد مع الطفل لما يهدى و نتكلم عشان نعرف اسباب عصبيته و نوجهه لطرق صحيحه للتعبير عن غضبه 

بفكركم ان ممنوع عقاب او عواقب قبل تكوين المنطق عند الطفل اللي عاده بيبتدي يتكون عند عمر ٣ او ٤ سنوات

٧- تقمص دور الضحيه

لما الطفل دايما يسمع اهله بيلومو علي كل حاجة حواليهم بيعيش دور الضحية 

لما يحاول يجيب حاجة عاليه و ما يطولهاش و يبكي و مامته تقوله عشان انت قصير كدة هو ضحية بنيته الجسديه

لكن لو قالتله انت مش طايلها عشان هي عاليه تفتكر ممكن توصلها ازاي 

تحط كرسي و تطلع عليه

ولا اشيلك ارفعك و لا نمد القلم نوقعها بيه 

كدة علمته ما يستسلمش و يتقبل الوضع الحالي و دايما يدور علي حلول 

لما يطلب من مامته لعبه و تقوله مافيش فلوس كدة هو ضحيه الفقر 

لكن لو قالتله الفلوس اللي معانا مش هتكفي تفتكر ممكن نجيب ثمنها ازاي 

نبيع مثلا شوية من العابك و نشتري اللي نفسك فيها بالفلوس

و لا نحوش جزء من مصروفك كل يوم

و لا نحطها في لستة هدايا عيد ميلادك 

فالصح ان احنا ندي للطفل خيارات او نشجعه يفكر في حلول للموقف اللي هو فيه و احنا نفسنا نتجنب نعيش دور الضحية لان الطفل بيقلدنا بالتبعيه 

اتمني اكون افادتكم و انتظروني بحلقات و نصايح اجمل ان شاء الله

دمتم في صحة و سعاده