٣ ڤيتامينات ضرورية للاطفال و الرضع تقوي المناعة و تحمي من الامراض و تزيد الذكاء

خلع الحفاض و تعليم الطفل دخول الحمام في ازهى صوره حاليا لان الجو بدء يتحسن و قربنا علي افضل معاد ندرب فيه الطفل عالحمام فعايزة اقولكم علي ٦ اخطاء مشهورة بتسبب ان العمليه تطول و يحصل منها مضاعفات و مشاكل فارجوكم تجنبوها و بالذات الخطأ الأخير 

لمشاهده الفيديو بدلا من قراءه المقال اضغطي هنا 

اول خطأ هيصدمكم لان دي اهم نصيحة بتسمعيها من الكل و كمان عقلك بيقترحها عليكي و هي انك 

تودي طفلك الحمام كتير 

كل نص ساعه او ساعه او ساعه و نص يوم ماتصبري عليه اوي توديه الحمام و دا مع الاسف غلط جدا 

لان الطفل بداية من عمر سنة و نص مثانته بتقدر تستحمل البول لمدة ساعتين بدون اي مشاكل 

فانتي لما بتودي الطفل كل نص ساعه مابيكونش اصلا حس بزنقة الحمام و بالتالي عمره ما هيفهم ان المفروض يروح الحمام لما يحس احساس الزنقه دا 

و غير كدة هتخلي الموضوع ممل اوي و يزهق منه بسرعه لان كل نص ساعه بتجبريه يقطع اللي بيعمله عشان يروح يعمل حاجة هو مش حاسس بوجودها اصلا 

عشان اثبتلك ان دا غلط 

هل انتي بتروحي الحمام كل نص ساعه 

اكيد لا 

يبقي ليه عايزة تعودي طفلك علي حاجة زي كدة

الخطا التاني هو انك 

تقعديه فترة طويلة

طبعا دا مترتب عالاولاني لان الطفل اصلا مش محتاج يروح الحمام و بالتالي هيقعد فترة طويلة علي ما يلاقي حاجة يفضيها و دا بالنسبالو تعذيب 

القعدة نفسها بتوجع الجسم و كمان الحمام مكان ممل جدا في حد ذاته و لو فكرتي تشغليه بموبايل ولا قصه يقراها فانتي كدة دمرتي الدنيا اكتر لان مش هيكون مركز خالص في جسمه و اللي بيحصل 

و كل اللي هتطلعي بيه شوية يورين نزلو بمحض الصدفة و مالهومش اي قيمة 

فياريت ماتقعديش الطفل مهما حصل اكثر من ٥ دقايق 

الخطأ الثالث سهل اوي ان احنا نقع فيه و هو

نسأل الطفل اذا كان عايز يروح الحمام او لا 

و ١٠٠٪ بيقول لا حتي و هو واقف يتلوي من الزنقه و ماسك نفسه بالعافيه

اصل اللعب بالنسباله حياه و انتي عايزة تحرميه منها عشان توديه مكان ممل هيتعذب فيه بالنص ساعه 

فحاولي تلغي السؤال دا من قاموسك 

و حوليه لجمله خبريه تقوليها وقت مشوار الحمام سواء بقي انتي ظابطة منبه او شوفتي عليه علامات الزنقه 

حبيبي يلا بينا وقت الحمام جده او وقت البيبي او يلا نعمل بيبي قبل ما يبل البنطلون 

الخطأ الجاي دا متضطرة اسفه اعترف اني وقعت فيه لان كنت رافضه فكرة ان حياتنا كلها تبقي نجاسه فقررت ادرب ابني و هو لابس البامبرز اللي علي شكل اندروير و كنت عارفه انه هيطول جدا بس مافرقش معايا الوقت الحقيقه مادام هتخلص من البهدله 

عارفين ليه بيطول لان الطفل لما بيحصله حادثة و يعمل علي نفسه ما بيحسش بالبلل بسبب امتصاص البامبرز لكل السوائل و بالتالي ما بيقرفش ولا يتضايق عكس لو لابس هدوم عادية مش هيطيق يقعد بيها لحظة مبلول 

طيب لو ظروفكم لا تسمح بالبهدلة و متضطرين تدربوه بالبامبرز تعملو ايه 

لبسوه اندروير عادي و بعدين عليه البامبرز و بالتالي هنحقق المراد بدون مانبهدل الحاجات

هو كدة لو عمل علي نفسه هيحس بالبلل و يتضايق برضو بس البامبرز هينقذنا و ينقذ بيوتنا 

فكرة عبقريه صح 

انا الحقيقه بهرتني 

برضو ممكن تستخدمي البانتس المخصوصه بتاع التدريب بتكون برضو بلاستيك و فيها قماش عادي من جوة فمابتحجزش البلل عن جلد الطفل 

الخطأ اللي بعد كدة كلنا بنقع فيه الحقيقه و هو الزعيق و الانفعال وقت الحوادث 

و مع الاسف دا ما بيحلش المشكلة ابدا بل بالعكس بيعك الدنيا و يخوف الطفل من التجربة و تلاقيه يكرس مخه في التفكير ازاي يعمل علي نفسه من غير ما تاخدي بالك و يروح يستخبي و هو بيعمل و انتي تبقي مؤمنة انه بيعند معاكي و يستفزك 

و من هنا احب انصحك لوجه الله تشوفي حلقة شعرية بلبن العصفور و كذلك شرح كتاب طفل المخ الكامل عالقناة عشان تفهمي الطفل بيعمل كدة ليه 

و طبعا مش محتاجين نقول ان التصرف السليم يكون بهدوء و حزم 

يعني تقوليلو

انا مابحبش حد يعمل بيبي عالارض بتاعتي 

البيبي مكانه الحمام فقط 

شوفت هدومك اتبلت و باظت 

يلا نغيرها و نشوف هنفكرك ازاي المرة الجاية لما البيبي ييجي

ايه رئيك لما تحسه هينزل ترقص و انا اخدك اوديك بسرعه جدا قبل ماينزل

اخر خطأ في منتهي الخطورة لانه بيسبب امراض جسدية 

و هو انك تجبري الطفل يعمل ستول او براز و هو رافض و خايف

فيبتدي يمسك نفسه بإرادته و يجيله امساك و بعدين الامساك يوجعه وقت الحمام و الالم يخليه يخاف اكتر فيمسك نفسه اكتر فالامساك يزيد اكتر و حلقه مفرغه قاسيه جدا و علاجها صعب 

فماتجبريش الطفل ابدا في النقطة دي بالذات و لو خايف فعلا و مصر يعمل الكيكي بس في البامبرز ارجوكي جربي الحل المبدع السحري اللي في الفيديو اللي ظاهر علي يميني دلوقتي

و ما تنسوش تشوفو كل خطوات التدريب في الفيديو اللي ظاهر علي شمالي 

و قلبي معاكم جميعا

دمتم في صحة و سعاده