٣ ڤيتامينات ضرورية للاطفال و الرضع تقوي المناعة و تحمي من الامراض و تزيد الذكاء

شاهد الفيديو هنا او اقرأ المقال في الاسفل

 ياتري حد فيكم سمع عن التربيه باللعب

تصورو ان ممكن بالزغزغه بس اللي هي اسمها بالانجليزي تيكلينج اقدر اربي الطفل و اعدل سلوكه

و اعالج مشاكل كتير زي الخوف و الغيرة بين الاخوات و طبعا كلنا عارفين ان ممكن احول المذاكرة الممله للعب في لعب و مع ذلك الطفل يفهم و يحفظ و يعشق وقت المذاكرة 

تعالو نشوف بالامثله الواقعيه ازاي نطبق الكلام دا 

في حلقتنا النهاردة هنتكلم عن اهمية اللعب بالنسبة للطفل 

ياترى اللعب مفيد للطفل و لا بس حاجة بيشغل بيها وقته 

بصراحة انا عمري مافكرت انه حاجة مهمة اوي كدة لحد مابدئت اقرأ في التربيه و اكتشفت انه عالم متكامل مالوش حدود وسلاح قوي جدا جدا لدرجة ان في علم اسمه العلاج و التأهيل النفسي باللعب

اللعب هو وظيفه الطفل الوحيده في الحياه 

هو الشباك اللي بيبص منه علي العالم

 هو العالم الخاص بتاعه و مملكته اللي بيقدر يكون فيها اي حاجة يحبها و يحقق فيها امنياته 

في لحظة تلاقيه بقي سوبر هيرو و بيطير في الجو و اللحظه التانيه بقي دودة بتزحف عالارض خايفه حاجة تدوسها بقي نونو بيعيط مستني حد يأكله و بعد دقيقه بقي ماما و بابا في نفس الوقت 

حقيقي ابداع مالوش حدود مش بس مجرد تضييع للوقت دا بيتعلم منه اساسيات الحياه و بيكتسب مهارات و سلوكيات يبني عليها كل كيانه و شخصيته في المستقبل

فطبعا لما تحرم شخص من حاجة جوهريه اوي كدة في حياته يبقي انت بتعمل جريمة في حقه و تستاهل ان الدنيا كلها تعاقبك عليها و عشان كدة القانون بيجرم عمل الاطفال لانه بيحرمهم من حقهم في اللعب و بيشغل وقتهم عن وظيفتهم الاساسية

زي ما الكلام مهم اوي عندنا لانه هو طريقتنا الاساسية للتواصل مع بعض و التعبير عن افكارنا و مشاعرنا و رغباتنا

 الطفل بقي بيستخدم اللعب بدل الكلام بيعبر بيه عن مشاعره و مشاكله الداخليه اللي لو فضل حابسها جواه هيتقوقع علي نفسه في النهايه و ينسحب واحدة واحدة لحد مايعتزل كل اللي حواليه او هيعبر عنها بغضب و يبتدي يئذي اللي حواليه صغيرين او كبار بالضرب او العض او حتي العند و الشقاوة 

الطفل اللي محتاج حنان هتلاقيه يلعب العاب فيها تواصل جسدي اكتر و فيها قرب و بعد زي الاستغمايه مثلا 

الطفل اللي عنده مشكله في المدرسه تلاقيه يحب يلعب مدرسه و طبعا هو هيقوم بدور الشخص اللي مدايقه في المدرسه كمحاوله منه انه يحس بالقوة و يتخلص من المشاعر السلبيه بالضحك و اللعب بس برضو ممكن يلعب دور الضحيه و يحاول يدي للي بيلعب معاه اشارات لحاجات معينة نفسه تحصل زي ان يقول للميس مثلا انا شاطر اهو مش هتصقفيلي بقي 

برضو كتير اوي بيعيش الطفل تجارب صعبه عليه و بيكون فيها مسلوب الاراده زي مثلا لما يروح يتطعم او ياخد حقنه فبيكون محتاج يعبر عن مشاعر المواقف دي في اللعب فتلاقيه يروح يلعب دكتور و يمثل انه بيدي حقنه لحد من اهله او حتي عروسه او دبدوب 

هو بكل بساطه بيعالج نفسه بنفسه بيعوض احساسه بالضعف و الهزيمه بإنه يلعب دور القوه و التحكم حتي لو تمثيل الا انه كفايه جدا لنفسيته و عقله انه يتعافي و يسدأ انه قوي برضه و عنده حريه الاختيار و غالبا يفضل يكرر نفس اللعبه لحد ما يتخلص من كل المشاعر السلبيه اللي جواه

لو ماعبرش بقي عن احساسه دا  في اللعب و تخلص منه بسرعه هيتدفن تحت الاعماق و يطلع بعدين في صوره عنف علي اطفال اضعف منه لمجرد انه يحس معاهم بالقوه او هيمثل نفس الدور في الحقيقه و يضر نفسه او غيره او هينهار بشكل هستيري لما يتكرر نفس الموقف في المستقبل بشكل مبالغ فيه مانقدرش نسيطر عليه بسهوله

فاحنا لو ركزنا مع طفل بيلعب هنقدر نعرف مشاعره و مخاوفه و نديلو المشاعر اللي محتاجاها او نربيه و نصلح سلوكه و  ناخد بإيده لبر الامان

طبعا كتير منكم هيقولي

معلش يعني 

لعب ايه اللي هنلعبه و احنا ورانا مسؤليات كتير جدا و معظم الوقت مشغولين او مرهقين جدا او حتي بنحاول بنهدي طفل مقريف ولا زنان او نقومه

دا غير بقي الوقت اللي بيضيع علي مانقنعه ينام او حتي ياكل و يعمل الواجب وووو

فالحقيقه اللعب دا اخر حاجة نفكر فيها

و بعدين يعني عيالنا اساتذة في اللعب مش محتاجينا نلعب معاهم و احنا كمان كبرنا علي اللعب و نسينا ازاي كنا بنلعب زمان و لعلمك بقي اهالينا ماكانوش بيلعبو معانا اصلا فهذا ماوجدنا عليه اباءنا

تمام اوي 

كل دا حقيقي مليون في المية

كلنا مشغولين بطريقه غير طبيعيه لدرجة ان اللعب مع اطفالنا بقي رفاهيه و حاجة بتتعمل بس في المناسبات

 بس لما نعرف ان من خلال اللعب لوحده نقدر نعمل كل حاجة متعلقه بيهم و في وأت األ من العادي و كمان بمجهود األ و بنتايج احسن هنندم علي كل لحظه ضيعناها من غير مانلعب

دا غير ان احنا لو حقيقي اندمجنا في اللعب معاهم هنستمتع جدا و هننسى تعبنا و هنصحي الطفل اللي جوانا

جرب بس كده تعمل انفسك اتكعبلت و هتقع او تجري بطريقه كوميديه او حتي تلبس لبس غريب زي الشورت في راسك بدل رجليك هتلاقي الطفل وقع من الضحك قدامك

اصل ضالطفل دايما حاسس انه اقصر و اضعف من كل اللي حواليه و ان تصرفاته عبيطه 

دايما بيوقع و يوقع الحاجات دايما الناس بتضحك علي حركاته و تصرفاته

فبيحب اوي اوي يشوف الكبار يتصرفو بنفس طريقته تلاقيه يضحك اوي لو شاف حد كبير اتكعبل ووقع او حد مثلا اتخض من حاجة او عمل اي حركة عبيطه شويه تلاقيه وقع من الضحك

عشان كده بنقول ضروري نخلع عبايه الهيبه و الوقار لما نلعب مع طفل  وننطلق بعفويه الطفوله و  ننسي تماما نظرات الناس و انتقاد اللي حوالينا 

عشان اوصل لقلب و عقل الطفل لازم حرفيا انزل لمستواه لو بيلعب عالارض انزل جنبه لو طفل اكبر و بيحب يلعب في النادي او المول اروح معاه بيحب موسيقي معينه او فيلم معين اتفرج معاه و اشاركه الاهتمام بأخلاص

 باختصار انا محتاجه اروح للطفل عالمه الخاص مش احاول اظبط اللعب علي هوايا

لما اندمج مع الطفل في العالم بتاعه و يديني الامان و يتعود علي وجودي و يثق في اخلاصي اقدر وقتها اتحكم في مسار اللعب و اوجهه لو حبيت 

مثلا

 لو الطفل بيلعب العاب عنيفه و محتاجه اقنعه يهدي اللعب شويه لازم الاول اشترك معاه كذا مره في العنف دا و باخلاص كإني فعلا مستمتعه بيه و مقتنعه بيه و بعدين ابتدي اقترح عليه بدائل افضل عشان يتقبل اقتراحاتي

و مش مقصود بالعنف ابدا اي سلوك فيه اذيه لنفسه او غيره و انما المقصود بيه اللعب الخشن زي انه مثلا يكسر اللعب او يخبط بعنف علي الاسطح او حتي يرمي الحاجة من ارتفاع زي البلكونه و خلافه بس طبعا هستخدم ادوات مناسبة

و مش معني كلامي ان اللعب العنيف ممنوع او مكروه ولازم دايما اقومه

 بالعكس الطفل بيحتاج النوع دا من اللعب برضو

 و مهم جدا جدا انه يلعبه في البيت مع حد من اهله لان بيمارس فيه احساسه بالقوه و الانتصار خاصه لو اللي بيلاعبه  بيلعب دور الاضعف اغلب الوقت

 لو الطفل ما طلعش الطاقه دي و مارس الدور دا في البيت تحت الملاحظه مع حد اكبر منه هيمارسه مع الاصغر منه سواء داخل او خارج البيت و ممكن يؤدي لأذيه الطفل او الاخرين 

الاب دايما بيلعب الدور دا حلو جدا من الطفوله لما يمرجح الطفل بشده شويه او يهشتكه او يلعب معاه مصارعه او حرب المخدات و حقيقي الطفل بيحب النوع دا جدا من اللعب و التواصل الجسدي و العاطفي فياريت مانحرموش من المتعه دي

عارفين مشكلتنا ايه مع اطفالنا 

مشكلتنا ان احنا بنندفع لردود الافعال المعتاده لما الطفل يتصرف بطريقه مستفزه لينا او يعمل سلوك غير مقبول و لو كان اطفالنا محظوظين كفايه هنمسك نفسنا و مانفقدش اعصابنا عليهم و نحاول نقومهم بطريقه لينه او عالاقل نشتت انتباهم عن الخطأاللي بيعملوه بطرق مختلفه

بس المخرج الوحيد اللي بننساه او بنخاف منه ان احنا نحول الموقف للعبه 

احنا بكل بساطه ممكن نحول اي موقف للعبه مش شرط ابدا العب يكون في مكان معين و بأدوات معينه ممكن اوي يتحول موقف غضب للعب مثلا طفل بيخبط رجله في الارض و يتنطط من الغضب و بيعيط علشان طلبه ماتنفذش 

ممكن الام تحاول تهديه و تطبطب عليه و ممكن اوي تزعق فيه عشان يسكت و تحاول تفهمه بالمنطق ليه حصل كده 

تخيلو لو بدل دا و دا الام قالت الرقصه الجديده دي جميله اوي و بدئت هي كمان تتنطط و تدور و تحاول تقلد حركاته برقص و عياطه بغنا و مافيش مانع من اضافه بعض البلاهه و التهور في الحركات و تمثيل الوقوع 

مؤكد ان دا هيخرج الطفل تماما من بركه اليأس و الاحباط اللي واقع فيها و مش بعيد اوي ينفجر في الضحك و القهقهه

مثال تاني طفل اطلق لقب غير لائق علي الام مثلا 

اول رد فعل معتاد هيكون الاعتراض و التنبيه ان دا مش مقبول و لو كرره هيتعاقب و خلافه و النتيجة المؤكده ان الطفل هيكرره في التو و اللحظه 

تعالو نشوف ازاي مثلا يتحول موقف زي دا للعبة

الطفل بيقول علي مامته مثلا ياغبيه 

الام هش وطي صوتك احسن حد يسمع السري بتاعي 

طبعا

الطفل بأعلي صوته هيكررها 

الام مش مشكله اهم حاجة ماتقولش عليه موزه اللذوذة احسن ماينفعش ابدا حد يعرف لاسم دا

الطفل بأعلي صوت عنده موزه اللذوذه و يفضل يكررها 

الام لا كده يبقي لازم ازغزغك وتجري وراه و تزغزغه

في لحظه نسي الكلمة الاولي و مارتبطتش في مخه انها حاجة بتدايق الام و لا اتحولت لموقف عند و الموقف كله اتسجل في المخ كلحظه سعيده كلها ضحك و لعب 

 علي فكرة الزغزغه او الدغدغه او التيكيلينج بالانجليزي حرفيا من النعم العظيمه جدا اللي لو استخدمناها صح بدون تعذيب للطفل هتحل كتير اوي من مشاكلنا 

و دا شرحته بالتفصيل في فيديو حركة باصابعك تسعد طفلك و تزيد ذكاؤه انصحكم جدا تشوفوه علي قناة مامي فرفوشه 

نفس الفكره ممكن نعتمدها كرد فعل لكتير من التصرفات العنيفه زي مثلا طفل بيخبط باباه بالمخده مثلا او بيرشه بمسدس المايه هنعتبر ان الاداه دي اداه الحب و الرد عليها بيبقي بسيل من الاحضان و البوس  (ايه دا انت خبطتني بمخده الحب كده يبقي لازم احضنك و ابوسك كتير اوي 

لو خليت اللعب اول حاجة الجألها لحل اي مشكله بتواجهني مع طفل هتجنب اوقات طويله اوي من الاحباط و العند 

زي مثلا طفل قفل علي نفسه اوضته و رافض الخروج او التواصل و غضبان بدل ما اهدد و اتوعد

 ممكن اكتب كلام بسيط او ارسم حاجة و ازق الورقه من تحت الباب مستحيل الطفل هيتجاهل تصرف زي دا فضوله هيتغلب عليه يشوف الورقه و يرد عليه و حتي لو مش بيعرف يقرأ ممكن اقرأهالو من ورا الباب 

و مش شرط يكون قافل علي نفسه اوضه ممكن اوي استخدم اللعبه دي مع طفل قاعد جنبي بس رافض يتواصل و متقوقع علي نفسه

ممكن بلعبه بسيطه جدا نحل مشكله كبيره جدا زي غيره طفل من البيبي الجديد 

زي الأم العبقريه اللي كل ما تلاحظ تصرف يدل علي الغيرة و ورفض المولود من ابنها اللي عنده ٣سنين تقوله انت محتاج جرعه حنان و تهريه بوس من رجليه لحد راسه و دا يخليه يقهقه و يتبدل احساس الغيره جواه لاحساس بالسعاده من اللعب و الضحك او تمثل انها بتكسر بيضه الحب علي راسه و تمسحها علي جسمه كله كإنها بتغلفه بحبها 

و بكده بتشبع عاطفته و تملى قلبه بالحب اللي في الاخر هيصبه علي اخوه او اخته

ممكن استغل اللعب و تمثيل الادوار في تعزيز ثقه الطفل بنفسه مثلا طفل رافض يرتب سريره و بيتدعي انه مش بيعرف و احنا متأكدين انه بيعرف 

ممكن اعمل حوار بين عروستين مثلا واحده بصوت ساخر و محبط بتقول انه مش بيعرف لانه صغير و ايديه صغيره و اخليها ماتشوفوش و هو بيرتبه و التانيه بصوت مبهج جدا و تشجيعي بتقول لا طبعا انا متأكده انه شاطر و بيعرف يرتبه و ايديه قويه جدا تقدر تظبطه كويس و استمر في الحوار بطريقه كوميديه هتفاجئ انه رتبه فعلا و هو بيضحك 

و ارجع اعيد تاني ان مش شرط ابدا استخدم ادوات معينه يعني ممكن اوي استخدم شوكه و معلقه بدل العروستين لو انا في المطبخ مثلا 

لو تخلصنا من ارتباط مفوم اللعب في عقلنا بالألعاب هنتفاجئ بابداع غير محدود 

من الالعاب الممتعه برضو و اللي بتعزز التواصل الجسدي خاصه عند الاطفال اللي بيرفضوه زي طفل ما بيحبش مثلا اهله يحضنوه و كمان بتعزز احساسهم بالقوه و بتشكل مخرج صحي و امن لطاقتهم العضليه و الحركيه 

لعبه الهروب اني اقول لطفل اتحداك تقدر تفلت مني و احاول امنعه فعلا من الهروب مني باستخدام قوه بسيطه كبدايه و مع الوقت ازيد شويه في شويه و ممكن اضيف كوميديا علي اللعبه باطلاق اسامي مضحكة علي التكنيك اللي بستخدمه زي مثلا اوبا انت عرفت تفلت المره دي بس مستحيل هتقدر تفلت من القبضه المهلبيه الولوبيه مثلا 

لازم برضو ياجماعه ندرك ان مش شرط ابدا ان الطفل يطلب نلعب معاه لما يفتقد الاهتمام او يحتاج ان كوبايه المشاعر اللي جواه تتملي حب و حنان ممكن جدا يعبر عن الاحتياج دا بعنف و كره و غضب ممكن اوي لما يقول لمامته علي فكره انا مابحبكيش يبقي معناه نفسي تلعبي معايا او نفسي تحضنيني ممكن اوي لما يقول لباباه و هو رايح الشغل انت وحش معناها نفسي تقعد معايا كمان شويه 

كل اللي محتاجينه في وقت زي دا ان احنا نقدر مشاعر الطفل و نحطها في كلمات و نعرفه ان احنا حاسين بيه و ان احساسه منطقي جدا و نفسر ليه هنعمل حاجة مدايقاها و طبعا يفضل ان نقضي معاه و لو كام دقيقه اضافيه قبل مانكمل اللي بنعمله

مثلا 

الطفل بابا انت وحش و انا بكرهك

الاب انت زعلتن علشان انا لازم اروح الشغل و اسيبك و معاك حق تحس كدة لان انت بتحبني و عايزني العب معاك اكتر بس انا لازم اروح الشغل علشان ماتحصليش مشكله 

بس ايه رئيك نتسابق الاول لاوضتك قبل ما امشي 

اللعب هو اكسير حياه الطفل ياجماعه فخلوه اولويه تكسبو اسعد اطفال في المنطقه 

دمتم في صحة و سعادة